ليه بتعتب علي حظك
أجيب الحظ منين والبخت مايل
قالولي رايح فين قلتلهم والله ماأنا قايل
قلت لنفسي أروح للصبر أشتكي حالي
لقيت الصبر بيشتكي ومهو عاجبه حاله
ضحكت وسبته ومشيت
وطول الطريق أكلم نفسي
وأقول والله داأنا مش شاب طايش
بس أنا عايش ومش عايش
قابلت حبه ناس
قالولي امشي في طريقك واتعدل
قلتلهم يا ريت أمشي معووج
وحال الدنيا يتعدل
مشيت مشيت وتعبت
لقيت الشجره قدامي
قعدت تحتها أغني موالي
قلت يا عين يا ليل
رد القمر وقالي موالك مش في المضمون
هتبكي وتبكي وفي الأخر كل ده ملهوش أي لزوم
قلتله خليني في حالي
وكَمِلت كلامه الشجره وقالت: ياما ناس قعدوا يحكوا
ومن ضيقتهم يبكوا
ويخلص الليل ويفضلوا يشكوا
بس الكلام ثابت والفعل مفيش
وأهي حال الدنيا كده
مره تسمعلك ومره تنفضلك
ومره تدور وشها عنك
بس اللي فاهم وعاقل
ما يحتارشي ولا يبكيش
قلتلهم يا ناس افهموني
...طيب طموحي أروح بيه فين
قالولي ادفنها زي اللي قبلك
..عزيمتهم كانت زيك
..وفي الأخر أهُم قاعدين علي المصطبه جانبك ...
ضحكت وقلت أنتوا المفروض تدوني أمل مش تحبطوني
ولإمتي هسكت ولا بحرف واحد أنطق؟؟
طول عمري همشي في السليم
ومش هحتار وهكون إنسان مستقيم
أسعي
أكافح
أعمل
أتعب
أحاول وأجتهد وليه رب إسمه الكريم
قلت أيوه دا هدفي
وماليش أنا في سكه الناس العطلانين
إللي قاعدين علي القهاوي وفي كل حته سكرانين
أنا في بدايه طريقي ونفسي أعمل شئ
نفسي أهد جسور فساد
وأبني بدلها قصور الخير
نفسي ونفسي ونفسي أكون
نفسي أفهم كل الشباب
نايم وهايم ودماغه في السحاب
نفسي أقول الشغل مش عيب
هحاول وأنا هوصل لأحلي شئ
أحلام كتير وفي عقلي دارت
أماني كتير وفي كل حته حيرتني معاها وإحتارت
وليه أقف وماكملش
أنا هبدأ وإللي يحاول بعد كدا ما يتعبش
ليه هعتب علي حظي
وأقول :لو بس حظي ...لو بس ..
أنا هبدأ صفحه جديده
ومش هعتب تاني
ولا هبقي أناني
دا حتي الكفاح بيبقا ليه طعم تاني
