اوعي تضيعي ومش ألاقيكي

اوعي تضيعي ومش ألاقيكي  

يا صديقتي

يا حبيبتي إزاي حبيتيه

دا إنتي يا دوبك 

لسه شايفه نظره عينيه

ولا عمرك كنتي تعرفيه

اوعي خيالك يخدك لحده

وتضيعي 

وماعدتش ألاقيكي بسبب حبك ليه

 يا بنتي هوه مش حاسس بيكي 

ولا حتي شايف عينيكي

ما تضحكيش علي نفسك 

وتتعبي راحه قلبك 

مفيش فايده 

وبلاش مناهده 

ووجع قلب ومغالطه

طب استاني لما يعدي تاني من جنب البيت

 وإنتي تصدقي كل كلامي

هوه لا عمره هيحس بيكي 

 ولا هيحس حتي 

برعشه قلبك وايديكي 

قلبك هوه اللي راح ليه 

وانتي عارفه إن عقلك

 ولا اتهز ولا اتحرك حتي ولا فكر فيه 

سبتي مشاعرك لطريق ما عرفتيش أخره

.هو لو كان حس بيكي

ولا حبك ولا حتي اتشد ليكي

أكيد كان هيبان من لهفته

دا كان هيسهر الليل ويفكر فيكي

لو كان حبك كان هيبان حنينه ليكي

وعمره ماكان هيسيبك لحيره عينيكي

عمره ما كان هيبعد

 مادام هوه حابب يكون جانبك

سيبك منه يا صديقتي والله انا خايفه عليكي

ومن كتر حبي ليكي 

حاسه اني مجروحه ليكي

يا تري فهمتي وعقلتي وهتحاولي

 تنسي الحب اللي عمره ما هيكون 

لانه مجرد احساس من طرف واحد 

.عقلك بجد مجنون 

عايز يعقل شويه عشان يعرف يعيش في الكون

ماهو كل شئ بيهون

 بس اوعي تضيعي ومش ألاقيكي